Во амфитеатарот на Универзитетот за туризам и менаџмент Скопје на 16.02.2016 година се одржа обука од страна на „Еразмус“-Национална агенција за европски образовни програми и мобилност.

На обуката се говореше за лансирањето на програмата „Еразмус“ во 1987 година, и како одтогаш повеќе од 1,5 милиони студенти и професори учествувале во Еразмус размени. Името Еразмус е акроним од “European Community Action Scheme for the Mobility of University Students”, а програмата се дефинира како програма која ја поттикнува мобилноста на студентите и на наставните кадри и Европската соработка, вклучувајки високообразовни институции и други клучни актери во економијата базирана на знаење.

Од 2007 година програмата Еразмус е вклучена во програмата Доживотно Учење на Европската Комисија. Учеството во програмата Еразмус подразбира исполнување на низа критериуми. Најважните критериуми се отворање на Национална Агенција која ќе биде одговорна за децентрализирано управување со програмата на национално ниво, како и отворање на Еразмус канцеларии на универзитетско ниво. Понатаму, за да можат да користат средства од Еразмус, заинтересираните високообразовни институции од Република Македонија треба да аплицираат и да станат носители на Еразмус Универзитетска Повелба.

Програмата Еразмус им нуди на учесниците различни можности за образование, обука, настава, меѓународна соработка и развој на меѓународни проекти и иницијативи. Целта на програмата е да промовира меѓународна соработка на лица, и да ја зголеми соработката помеѓу различните организации вклучени во високото образование во Европа.

На обуката присуствуваа професори од различни образовни институции во Македонија кои беа подетално информирани за начинот на аплицирање и можности кои се нудат.

На предавањето се објаснуваше за придобивките кои се добиваат со учество во Еразмус програмата односно за придобивките од размената на наставен кадар надвор од границите на нашата држава.

Интеракцијата помеѓу предавачите и публиката придонесе за врвна успешност на презентацијата.