Признание од Институтот на Светскиот туристички форум за извонреден придонес во туристичкото образование и дигитализацијата на туристичкиот бизнис.

Универзитет Скопје е добитник на Светската туристичка награда за 2026 година во категоријата „Најдобра образовна програма за туризам“, како признание за успешната реализација на програмата „Паметни вештини за паметна иднина – Дигитализација во туристичкиот бизнис“ (Smart Skills for Smart Future – Digitalization in Tourism Business), спроведена во рамките на програмата Еразмус+.

Ова престижно меѓународно признание што го доделува Институтот на Светскиот туристички форум, претставува потврда за квалитетот на образовните иницијативи на Универзитет Скопје, неговата посветеност на современите образовни трендови и заложбите за унапредување на туристичкиот сектор преку примена на дигиталните технологии и развој на практични вештини кај идните туристички професионалци.

Во известувањето до ректорот на Универзитет Скопје, Проф. д-р Аце Миленковски се вели: „Меѓународното жири ги препозна достигнувањата и извонредната работа на Универзитетот како значаен придонес кон развојот на туристичкото образование и подготовката на нови генерации стручни кадри способни да одговорат на предизвиците и потребите на современиот туристички пазар“.

Свечената церемонија на доделување на Светските туристички награди ќе се одржи на 9 ноември 2026 година во Кралските музеи за ликовни уметности во Брисел, Белгија, во рамките на Годишниот состанок на Глобалниот туристички форум (Global Tourism Forum Annual Meeting). На настанот се очекува присуство на министри, високи владини претставници, лидери од глобалната туристичка индустрија и истакнати меѓународни гости.

Добивањето на оваа награда претставува значајно признание за Универзитет Скопје и дополнителен поттик за продолжување на активностите насочени кон иновативно образование, дигитална трансформација и создавање квалификувани кадри кои ќе придонесуваат за одржливиот развој и конкурентноста на туристичкиот сектор.

Со ова меѓународно признание, Универзитет Скопје ја потврдува својата заложба за унапредување на образовните стандарди, развој на современи компетенции и поврзување на високото образование со потребите на туристичката индустрија.