Скопје, 03.06.2024 година – Универзитетот Скопје денеска беше домаќин на младинскиот тим на КК Работнички Скопје, најодликуваниот кошаркарски тим во историјата на Република Македонија. Нашето гостопримство ја истакна посветеноста на Универзитетот за поддршка на локалните спортски тимови како дел од нашата постојана заложба за општествен ангажман и поттикнување силни врски со заедницата.

На младите кошаркари топло добредојде им посакаа генералниот секретар на Универзитетот, проф. д-р Јана Илиева, како и асистент м-р Љупчо Миленковски. На младите спортисти им се обрати и ректорот на Универзитетот, проф. д-р Аце Миленковски.

„На Универзитетот Скопје веруваме во негувањето не само на академската извонредност, туку и на целокупниот развој на нашата младина“, истакна  тој во своето обраќање. „Со поддршка на младите од КК Работнички Скопје, инвестираме во идните лидери и шампиони на нашата држава.“

„Неопходно е младите спортисти да ги видат можностите што ги чекаат, како на теренот, така и надвор од него. Оваа посета е само еден од многуте начини со кои имаме цел да ги инспирираме и да ги поддржиме младите во нашата заедница“, нагласи асистент м-р Љупчо Миленковски, кој на гостите им ги презентираше можностите за професионален и личен раст што ги нуди Универзитетот Скопје.

Во рамките на посетата, на младите играчи им ги претставивме студиските програми на Универзитетот, престижните меѓународни признанија и сертификати и различните воннаставни активности достапни за студентите. Нашите херои на спортските терени го разгледаа и кампусот на Универзитетот доживувајќи ја од прва рака енергичната академска средина и извонредните услови за студирање.

Универзитетот Скопје им останува посветен на своите иницијативи за општествена одговорност, континуирано барајќи начини да ѝ се оддолжи на заедницата и да го поддржи развојот на младите таленти. Оваа посета го означува почетокот на силната соработка помеѓу Универзитетот и младинскиот тим на КК Работнички Скопје со цел да се инспирира и да се поттикне следната генерација лидери и спортисти.