Врз основа на добиената акредитација и согласно критериумите предвидени со Правилникот и Пропозициите за организирање и реализирање на натпревари по географија, Здружението на професори по географија на Македонија „ПРОФ. Д-Р ЉУБЕ МИЛЕНКОВСКИ“ – Скопје во соработка со УТМС Институтот за национална географија, успешно ги реализираше натпреварите на општинско, регионално и државно ниво.

На 29.05.2024 година, со почеток во 12:00 во преполн амфитеатар на Универзитетот Скопје беа доделени дипломи, пофалници, потврди и признанија на сите учесници на државниот натпревар по географија.

Покрај дипломите, за учениците и менторите кои ги освоија првите три места беа обезбедени и соодветни награди и тоа за освоено 1 место лаптоп, за 2 место мобилен телефон и за освоено 3 место таблет.

Добитници на наградите од 7 одделение се: ученикот Стефан Прпев од ООУ „Панко Брашнаров"- Велес со освоени 1 (прво) место под менторство на наставникот Коста Шупевски. 2(второто) место и припадна на ученичката Милијана Николова од ООУ „Вера Јоциќ - Гази Баба, Скопје“со менторот Драган Димитровски, додека 3(третото) место го освои ученикот Огнен Аќимоски од ООУ „Мустафа Кемал Ататурк“- Гостивар под менторство на наставникот Дарко Оносимоски.

Во категоријата ученици од 8 одделение, првите места и заслужените награди им припаднаа на учениците: Стефанија Димовска од ООУ „Тодор Ангелевски"-Битола со менторот Гордана Богоевска, Самир Елмази од ООУ „Наим Фрашери"- Студеничани со менторот Тела Јусуфи и ученикот Павел Ивановски од ООУ „Методија Митевски Брицо“ - Лозово под менторство на наставникот Марина Доневска.

Добитници на првите три места и наградите во категоријата 9 одделение се: ученикот Лукијан Лазаров од ООУ „Кочо Рацин" - Скопје со менторот Марина Гроздановска, Ива Ивановска од ООУ „Јан Амос Коменски“- Скопје со менторот Сузана Јакимовска и  Анастасија Андова од ООУ „Св Климент Охридски" - Македонски Брод под менторство на Горан Ѓуроски, Сергеј Димовски од ООУ „Кире Гаврилоски - Јане“ - Прилеп со менторот Милан Јаковоски и Дамјан Милески од ООУ „Димитар Поп Беровски“ - Ѓорче Петров под менторство на наставникот Вера Ангеловска.

Претседателот на здружението проф. Д-р Аце Миленковски во својот поздравен говор им вети можност за добивање на стипендија за студирање на еден од факултетите на УТМС по завршување на средното училиште.

Секако еден од условите е одличен успех и континуирани високи резултати по предметот географија. Ова беше мотив плус и потстрек на секој учесник поединечно а радост и воодушевување од страна на родителите.

На учениците кои освоиле над 85 бода на државниот натпревар им беа доделени Пофалници за учество и освоена 1, 2 и 3 награда за постигнување на високи резултати, додека на сите останати Потврда за учество на државен натпревар.

На сите Основни Училишта им беа доделени Благодарници за учество, додека Признанија за посебен придонес во успешно организирање на натпреварите добија повеќе членови и регионални координатори на здружението.

Дипломите и наградите на првопласираните ученици им беа доделени од страна на претседателот на здружението, проф. д-р Аце Миленковски. Останатите сертификати ги додели потпретседателот проф. Д-р Дејан Наковски.         

Настанот беше спонзориран преку Фондот „Проф.д-р Љубе Миленковски“ кој во рамките на своите општествено одговорни активности, многу пати се јавува во улога на покровител на настани од ваков тип.

Од стручен аспект, а во функција на унапредување на компетенциите на образовниот кадар од сите структури на воспитно-образовните институции во Република Северна Македонија и унапредување на наставата по географија на сите нивоа, како и до сега, така и овој пат натпреварите беа поддржани од УТМС Институтот за национална географија.

Општ впечаток е дека натпреварите по географија кои по четврти пат беа организирани од страна на нашето здружение ги постигнаа поставените цели и ги надминина сите предизвици.

Остануваме посветени на нашиот пат, силно уверени дека ќе успееме и понатаму да го подобриме квалитетот на натпреварите по географија на сите нивоа на натпреварување.

До следното видување, на добитниците на дипломите и наградите им честитаме, а на сите учесници на натпреварите им посакуваме добро здравје и успех во животот на сите полиња.

Здружението на професори по географија на Македонија
„ПРОФ. Д-Р ЉУБЕ МИЛЕНКОВСКИ“ – Скопје