Денес, во храмот на знаењето – амфитеатарот на Универзитетот за менаџмент и туризам во Скопје, на учениците-учесници на Државниот натпревар по географија за учебната 2021/2022 година, им беа додели заслужените награди и признанија. Натпреварот и оваа година, традиционално го организираше Здружението на професори по географија на Македонија „Проф. д-р Љубе Миленковски“ – Скопје, поддржано од Институтот за национална географија на Универзитетот за туризам и менаџмент.

Првопласираните ученици, како и нивните ментори, освен со диплома за освоеното место на натпреварот, беа наградени и со лаптопи. Второпласираните учесници добија мобилни телефони, а третопласираните беа наградени со таблети. Учениците што постигнаа високи резултати, но кои не успеаја да се пласираат на едно од првите три места, добија енциклопедии. На сите останати учесници им беа доделени пофалници за учеството и за постигнат успех.

Наградите ги обезбеди Фондацијата „Проф. д-р Љубе Миленковски“ – Скопје, а на учесниците им ги врачи лично проф. д-р Аце Миленковски, ректор на Универзитетот за менаџмент и туризам и претседател на Здружението на професори по географија. Во својот поздравен говор, проф. д-р Миленковски им упати честитките на младите географи и нивните најголеми поддржувачи – родителите и менторите, и им посака да продолжат да чекорат по патеката на успехот во својот живот.