На 28-ми Октомври 2018 година во Македонска опера и балет во Скопје се одржа уникатна, свечена промоција на десеттата генерација дипломирани студенти на прв циклус студии и на осмата генерација студенти на втор циклус студии на Универзитетот за туризам и менаџмент во Скопје. Свечената промоција започна со интонирање на државната химна на Република Македонија по која следеше интонирање на студентска химна „Gaudeamus Igitur“. На свеченото отварање беше изведена балетска точка од балетот на МОБ: „O fortuna“, Karmina Burana, Carl Orff, како и балетска претстава „SIMPLY THE BEST“ посветена на УТМС.

На свечената промоција свое обраќање имаше ректорот на Универзитетот за туризам и менаџмент во Скопје, проф. д-р Аце Миленковски, кој во својот говор ја потенцираше синергијата со вработените и соработниците со кои го создаде храмот на знаењето, центарот на успехот, институција која обединува минато, сегашност и иднина, ентузијазам и традиција, мудрост и љубопитност. УТМС е институција која перманентно ја промовира моќта на знаењето, посветеноста кон работата за постојано иновирање и креативно реализирање на наставата преку која студентите се стекнуваат извонредни компетенции, а со тоа се профилираат како високо конкурентни на пазарот на трудот. Во тој контекст Ректорот истакна: „ УТМС му служи на општеството. Изборот што го прави нашата институција ги одразува нашите амбиции и нашите визии. Кога гледам во вашите очи, ги гледам космичките соѕвездија кои спојувајќи ги во една најсветла точка ми го отвараат видикот на успешни економисти, претприемачи, менаџери во туризмот, маркетингаши и кадровски менаџери. Оваа диплома вам ќе ви даде јасен патоказ за тоа кои сте и колку вредите. А вредите многу. Вие, почитувани студенти, сте најсилниот партнер на УТМС, најсилниот партнер на светот, најголемата надеж на секое демократско општество, Вие сте нашиот бренд производ, нашите бренд лидери по кои не препознаваат другите“.

Исто така во своето обраќање, ректорот, проф. д-р Аце Миленковски, го потенцираше перманентното инвестирање на академскиот кадар во воспоставување на високи едукативни стандарди според примерот на познатите светски универзитети за што говорат и бројните награди за квалитет во високото образование, за бизнис престиж, супер бренд и други.

Своето обраќање Ректорот го заврши со силна порака: „УТМС како престижна виоко-образовна институција има постигнато врвни резултати и успеси. Престижот сите нас не обврзува многу сериозно да размислуваме за иднината, исклучително внимателно да го следиме патот на светски најуспешните универзитети. Наша идна заложба е да продолжиме да образуваме и продуцираме кадри кои ќе направат радикални промени во насока на подобрување на општествената и економската благосостојба на Р. Македонија. Ви посакувам плодни, продуктивни години, живот полн со благосостојба, работа, труд, изобилие и љубов! Вие сте граѓани на Република Македонија! Одржете ги опциите на татковината кои се подобри од Вашите интереси! Запомнете: македонската земја заедно со УТМС ја создава секоја можност за Вас! Ве молам прифатете ги моите најдобри желби за среќен и успешен живот и уште поуспешна кариера”.

Специјален гостин на свечената промоција беше г-дин Мехмет Дурмаз, сопственик и извршен директор на „Еmre Ltd.“, Анкара, Република Турција, на кој рекоторот на Универзитетот за туризам и менаџмент во Скопје, проф. д-р Аце Миленковски, му ја врачи одлуката за почесен доктор на науки (DOCTOR HONORIS CAUSA) на УТМС. По официјалното прогласување за почесен доктор на науки, г-дин Мехмет Дурмаз им се обрати на присутните, искажувајќи ја својата благодарност кон ректорот. Во својот говор г-дин Мехмет Дурмаз ја истакна плодната соработка со УТМС и заложбите за продолжување и продлабочување на истата во насока на подобрување на капацитетите на УТМС преку конзистентни активности со бизнис секторот.

На свеченоста беа доделени награди и признанија на вработени со врвни достигнувања во образовната и научно-истражувачката работа на УТМС, како и на бизнис партнери.

На промоцијата присуствуваа видни личности од релевантни институции, претсавници од деловната заедница и други гости. По доделувањето на дипломите и традиционалното фрлање на капите, свеченоста беше одбележана со коктел за сите присутни гости.
Импресивната, сепктакуларна и сензационална промоција предизвика воодушевувањето и задоволството на дипломците и магистрите, нивните семејства и пријатели, како и на другите гости, која според коментарите на сите, е уникатна во Македонија, каков што е и УТМС.