Во амфитеатарот на Универзитетот за туризам и менаџмент - Скопје, денес, 18.09.2017 година, се одржа свечен академски час со кој официјално се означи почетокот на академската 2017-2018 година. На свеченоста присуствуваа идните академски граѓани, кои одлучија своето образование да го продолжат на еден од петте факултети, кои функционираат во рамките на Универзитетот за туризам и менаџмент, односно Факултетот за туризам, Факултетот за менаџмент на човечки ресурси, Факултетот за претприемачки бизнис, Факултетот за меѓународен маркетинг менаџмент и Економскиот факултет.

Свечениот час го отвори Генералниот секретар на УТМС кој на студентите им посака топло добре дојде, и го најави обраќањето на проректорот за настава, проф. д-р Мијалче Ѓоргиевски. Во своето обраќање, проректорот за настава, посебно ја истакна уникатноста на УТМС, пред се по методологијата на студирање која ќе им овозможи да се стекнат со квалитетни компетенции со кои по дипломирањето ќе бидат конкурентни на пазарот на трудот и успешни во градењето на професионалните кариери. Во тој контекст говореше за компатибилноста на наставните програми со тие на престижните универзитети во Европа и во светот, Еразмус+ програмата за размена на студенти и студиски престој, меѓународно признатата диплома која им овозможува мобилност во студирањето и работењето, соработката со бизнис секторот од кој ќе ги учат најдобрите практики за успешност.

На крајот од името на ректорот, проф. д-р Аце Миленковски, и од името на вработените, проректорот за настава, на студентите им посака успешна академска година.

По обраќање на проректорот за настава, систем администраторот на студентите им презентираше како функционира Е-студент, т.е. екстерниот портал од веб страната наменет за студентите преку кој ги добиваат сите информации во електронска форма. Потоа следуваше врачување на Е-индексите на студентите од страна на деканите на факултетите.

По завршувањето на свечениот час студентите од секој факултет имаа одделни средби со деканите на кои беа информирани за идни активности во академската 2017-2018 година.