Универзитетот за туризам и менаџмент од Скопје, во соработка со националното радио, Радио Слободна Македонија, на 07.02.2016 година ја емитуваше четириесет и деветтата емисија од серијалот емисии посветени на убавините и туризмот во Република Македонија.

Емисијата насловена како "Туристички витраж" се емитува секоја недела со почеток од 13 до 14 часот на брановите на Радио Слободна Македонија. Оваа недела, професорите и асистентите од Универзитетот за туризам и менаџмент, односно Асс. м-р Гордана Серафимовиќ како водител, заедно со нејзините колешки Доц. д-р Наташа Ристовска и Доц. д-р Јана Илиева ја посветија на темата“Влијанието на климатските промени на туризмот“

Во првиот дел од емисијата стана збор за климата како одлучувачки фактор за многу туристи, кога избираат дестинација за одмор, при што беше потенцирано дека голем дел од туристичките активности во една земја, зависат од стабилноста на климата. Додека во вториот дел се говореше за Република Македонија, каде беше напоменато дека намалените врнежи на снег на пример, можат негативно да влијаат врз зимските туристички капацитети, особено врз оние на пониска надморска висина, како што се Маврово и Крушево. Од друга страна пак, поради повисоките температури во лето, најголемиот дел од странските туристи нема да се одлучат за активности на отворено.

Како последица на климатските промени, како што беше потенцирано во емисијата, традиционалните предели во Република Македонија, како и познатите лозја можат да претрпат значителни промени.

И покрај неоспорната врска помеѓу стабилноста на климата и развојот на туризмот, сè уште постои неусогласеност во научната литература за тоа какви ќе бидат последиците од климатските промени врз секторот туризам. Експертите сметаат дека истражувањата на мерките за адаптација во секторот туризам се околу пет години зад таквите истражувања.