Студентката Николина Костовска од Факултетот за туризам, успешно ја започна програмата за мобилност на реномираниот Политехнички Институт IPCA, Португалија. Видно возбудена и среќна, Николина ги охрабрува сите студенти на УТМС да ја искористат можноста која ја нуди оваа Европска програма и да се вклучат во рамките на студентската мобилност:

“Мојата португалска авантура започна на 11-ти септември, со лет од Скопје до Цирих, кој се надоврза со лет кој ме однесе во еден од најавтентичните градови во Португалија – Порто. Иако се уште не сум видела голем број од дестинациите и историските обележја, започнувам да го чувствувам позитивниот дух на Португалците и искрено се надевам дека следните неколку месеци од мојот престој тука, ќе бидат едни од најубавите во мојот живот, исполнети со дружби со луѓе од различни страни на светот, разгледи на португалското природно и антропогено богатство и вкусување на традиционалната гастрономија, вклучувајќи го и нивното сортно, домашно вино. На крајот од студии, се надевам дека ќе се вратам во мојата татковина со богато знаење за туризмот и убедена сум дека ќе бидам исполнета со безброј спомени и едно прекрасно искуство на кое уште од сега му се радувам“.

Програмата Еразмус Плус предвидува студентите да посетуваат настава и да полагаат одреден број на сродни предмети на некој од универзитетите во Европа, со кој Универзитетот за туризам и менаџмент има склучено договор за соработка и да освојуваат одреден број на ЕКТС кредити, кои ќе им бидат признати по враќањето во матичната институција.

Универзитетот за туризам и менаџмент во Скопје постојано го зголемува бројот на склучени договори за соработка со странски високообразовни установи, со цел да им се овозможи на студентите, дел од своето студирање да го остварат во странство.