По повод одбележувањето на 20-годишниот јубилеј на Универзитет Скопје, во рамки на конференцијата Профемина се одржа дискусија на тема „Од диплома до лидерство-знаењето како вредност, можност и иднина“, посветена на образованието, професионалниот развој на младите, европските вредности и женското лидерство.

На панелот учествуваа проф. д-р Јана Илиева, генерален секретар и професор на Универзитет Скопје, проф. д-р Викторија Трајков, заменик-министер за европски прашања, доц. д-р Ангела Миленковска-Климоска, професорка на УТМС, како и Симона Спиркоска, дипломка на УТМС. Разговорот го модерираше новинарката м-р Билјана Трендафилова.

Учесничките испратија порака дека дипломата е важна основа, но за успех на современиот пазар на трудот се потребни и практични вештини, критичко размислување, дигитална писменост, комуникациски способности и подготвеност за постојано учење. Зборувајќи за дваесетгодишниот развој на Универзитет Скопје, проф. д-р Јана Илиева ја истакна важноста на квалитетното образование и вредностите што Универзитетот им ги пренесува на генерациите студенти. Таа ја нагласи и потребата од поврзување на академската заедница со бизнис-секторот, со цел студентите уште за време на студирањето да стекнуваат практични искуства и подобро да се подготват за професионалните предизвици.

Доц. д-р Ангела Миленковска-Климоска, осврнувајќи се на својот пат од студентка со индекс број еден до професорка на УТМС, ја истакна вредноста на континуираното учење, личниот развој и споделувањето на знаењето со помладите генерации. Нејзиниот пример ја отсликува поврзаноста меѓу образованието, посветеноста и професионалното напредување.

Проф. д-р Викторија Трајков зборуваше за значењето на европската перспектива за младите, компетенциите потребни за конкурентност на европскиот пазар на трудот и важноста на личната иницијатива и професионалниот интегритет. Посебен акцент беше ставен на создавањето еднакви можности за жените и нивното поголемо учество во лидерските позиции и процесите на одлучување.

Од перспективата на младите дипломци, Симона Спиркоска ја нагласи важноста на практичното искуство, активното учество за време на студирањето и подготвеноста за нови професионални предизвици. Нејзината порака беше дека младите треба да ги препознаваат можностите, да преземаат иницијатива и да продолжат да инвестираат во сопствениот развој и по завршувањето на факултетот.

Дискусијата ги опфати и предизвиците поврзани со професионалната иднина на младите, можностите за развој во земјата и странство, како и улогата на образованието во создавањето одговорни, активни и компетентни личности. Новинарката м-р Билјана Трендафилова нагласи дека Универзитетите имаат важна улога не само во пренесувањето знаење, туку и во поттикнувањето критичко размислување, лидерството, дијалогот и почитувањето на европските вредности.

Со оваа дискусија, Универзитет Скопје го одбележува својот јубилеј потврдувајќи ја посветеноста на образованието, професионалниот развој и создавањето можности за младите. Дипломата е почеток, знаењето ја отвора вратата, а искуството, истрајноста и интегритетот го претвораат знаењето во можност и лидерство.