Со ранче за спортска опрема, Универзитетот за туризам и менаџмент им го честита првиот училиштен ден на скопските првачиња. Подароците денеска Универзитетот им ги донираше на скопските општини, кои треба соодветно да ги распределат во основните училишта во нивна надлежност. На спортските ранчиња, придружени со честитка за родителите, ќе им се израдуваат околу 4200 првачиња.

„Почитувани родители, овој ден е посебен ден, како за вашите најмили првачиња, кои денеска зачекоруваат во светот на образованието, така и за вас, нивните родители. Ви посакуваме овие мигови со солзи радосници во очите да бидат едни од многуте во кои ќе се гордеете со безбројните успеси што ќе ги нижат вашите најмили во животот, вашите и нашите деца“, им го честита и на родителите првиот училиштен ден проф. д-р Аце Миленковски, ректорот на Универзитетот за туризам и менаџмент во Скопје.