Согласно годишната програма за работа на Факултетот за претприемачки бизнис на ден 02.04.2018 година, гостин предавач од деловната заедница беше г-ѓа Илина Вељановска, основач на социјално претпријатие и добитник на наградата Social Impact Award за 2017 година, а воедно и ментор во рамките на најголемиот Европски проект за млади луѓе и студенти на тема претприемништво. Таа на УТМС одржа предавање и работилница на тема: „Социјално претприемништво”.

Проектот е основан и инициран од страна на Универзитетот за бизнис и економија во Виена и Impact Hub, а мисијата е да го промовира социјалното претприемништво меѓу младите луѓе и студентите. Самиот проект е сочинет од три дела: едукативен дел, натпревар и наградување, како и инкубација на финалистите со цел понатаму да ја развиваат својата идеја.

Учесниците на работилницата имаа можност да ги спознаат основите на концептот на социјалното претприемништво и беа мотивирани да размислуваат и развијат бизнис идеи за основање на сопствено социјално претпријатие. Студентите беа вклучени во дискусијата за потенцијални идеи за социјални бизниси кои би можеле да направат одредена општествена промена.

На овој начин се подигнува свеста кај младите за социјалното претприемништво и им се овозможува неопходната поддршка за да станат социјални претприемачи кои директно би влијаеле на унапредување на својата локална заедница.